Дэлхийн
улс орнуудын угаалгын машин нэг л
загвартай биш байдаг. Европ, Америк
болон Японы угаалгын машин өөр өөр
загвартай гэнэ.


Европынх
голчлон эргэдэг дамартай бөгөөд дотор
нь хийсэн хувцсаа өргөөд дээрээс доошоо
унагаад цохилтоор угаадаг. Америкийнх
машины ёроолоос дээшээ босоо саваатай
ба түүгээр усыг эргүүлдэг. Японых ёроолын
хэсэгт буй сэнсээр хүчтэй хуйлралт
үүсгэдэг.


Яагаад
ийм ялгаатай гэвэл эрт дээр үеийн европт
хувцсыг модоор цохиж хөлөөр гишгэж
угаах заншилтай байсан. Дээр нь дундад
зууны үед хар тахал ихээхэн хэмжээгээр
дэлгэрсэн тул хувцсаа заавал буцалсан
усаар угааж ариутгана гэсэн ойлголттой
болсон. Европын ус хатуу чанартай буюу
эрдсийн агууламж ихтэй тул халаагаагүйгээр
угааж цэвэрлэх боломжгүй байдаг.


Харин
Америкт дээр үед усаа бага зэрэг халаагаад
модоор хутгаад угаадаг байсан. Усан
дахь эрдсийн агууламж дунд зэрэгтэй
тул буцалтал халаах албагүй байдаг. Ийм
загвартай угаалгын машин европынхныг
бодвол арай илүү бохирыг гаргах чадвартай
боловч овор ихтэй байдаг. Хэдийгээр
тийм боловч ихэнх америкчууд хангалттай
том орон сууцтай бөгөөд угаалгын машинаа
гэрийн доод давхрын өрөөнд тавьдаг тул
ямар ч асуудалгүй юм.

Японд
чийглэг уур амьсгалтай тул хувцсаа
байнга угааж цэвэрлэх заншилтай. Европ
болон Америкийн айлд бараг долоо хоногт
нэг угаалгын машин ажиллуулдаг бол
ихэнх япон айлд өдөр болгон ажиллуулдаг.
Дээр нь орон сууцны нөхцөл муутай тул
угаалгын машин овор багатай байх
шаардлагатай. Японы ус зөөлөн чанартай
буюу эрдэс багатай учраас хүйтэн усаар
угаасан ч бохир гаргаж чаддаг.

Япон
загварын угаалгын машин усаа халаадаггүй бөгөөд Америкийн загвар
шиг их хэмжээний ус шаардахгүй тул
богино цагаар түргэн угаах чадвартай.
Бохирыг арилгах чадвараар ч илүү байдаг.
Харин усанд хүчтэй хуйлар үүсгэдэг тул
хувцсаа илүү гэмтээнэ гэсэн дутагдалтай.

Мөн
хувцсаа машинаар хатаахын тулд дамартай
загварынх тохиромжтой учраас ойрын үед
Америк болон Японд европ загварын
угаалгын машин авах хүний тоо нэмэгдэж
байна гэнэ.