Германы Угсаатны музейн Энэтхэгийн хэлтсийн дарга асан Алберт Грюнведелээр ахлуулсан судалгааны баг 1902–1914 оны хооронд өнөөдрийн БНХАУ-ын Шинжаан-Уйгарын өөртөө засах орон дахь Турфан нутгаар очиж дөрвөн удаа хайгуул судалгаа явуулсан.
Тус хайгуулын ажлаар олдсон маш олон эд өлгийн зүйлс, хадны сүг зураг, эртний бичмэл зэргийг тэд Берлин хотод аваачсан байна. Түүнээс онц чухал зүйлийг дурдвал Төв Азид олдсон мани шашны судрын эх, согд хэлээр бичигдсэн христийн шашны бичиг судар, бактрийн хэл болон эфтали үсэгтэй бичгийн тасархай, дундад зууны перс хэлний шүлгийн хэсэг болон эртний турк үсэгтэй бичээс гэх мэт болно.
Өнөөдөр эдгээр эртний бичмэл Берлин-Бранденбургийн шинжлэх ухааны академи болон Берлин мужийн номын санд хадгалагдаж байна. Монгол хэлээр бичигдсэн бичмэлийн хувьд гэрэл зураг авалт болон нөхөн сэргээлт хийж нандигнан хадгалагдаж байна.
Илүү их мэдээлэл: turfan.bbaw.de — Turfan монгол бичмэлүүд