11. Мэйжигийн үе /1868-1912 он/
Эдогийн сүүлчийн жанжин төрийн эрхийг эзэн хаанд буцааж шилжүүлсэн нь хуучин засгийг дэмжигчдийн эсэргүүцэлтэй тулгарсан ч, тэднийг ялсанаар шинэ засгийн газар байгуулагдсан бөгөөд энэ үеийг Мэйжигийн үе гэж нэрлэдэг.
Тухайн үед барууны орнууд бие биенээсээ урьтан Азийн орнуудыг колони болгож байснаас улсаа хамгаалахын тулд Япон Улс маш хурдан барууны соёлыг нэвтрүүлэх шаардлагатай гэж үзээд шинэ засгийн газар шилж сонгосон хүмүүсийг барууны орнуудад суралцуулжээ. Үүний дүнд Улсын хурал ба Сайд нарын зөвлөлийг бий болгож Эзэн хаан улс орны тэргүүн болохыг заасан үндсэн хуулийг боловсруулж гаргасан юм.
Эдогийн үед гадаад орнуудтой худалдаа хийхийг бараг бүр мөсөн хориглосоноос үүдэн Япон Улс техник технологийн хувьд дэлхийн төвшинээс хол хоцорсон байж. Тиймээс Мэйжигийн засгийн газар шуудангийн систем бий болгох, төмөр зам тавих, экспортын бүтээгдхүүний үйлдвэрүүдийг байгуулах гэх мэтээр нийгмийн шинэчлэлийг асар хурдацтай явуулахын зэрэгцээ цэргийн хүчээ улам бүр зузаатгаж байлаа.
Ингээд дөнгөж сая улсаа нээлттэй болгосон арлын жижиг Япон орон нь “нойрсож буй арслан” гэгдэх Чин Улс болон Орос Улстай дайтаж ялалт байгуулсан. Улмаар Солонгос Улсыг эрхшээлдээ бүрэн оруулсанаар барууны орнууд Япон Улсын сүр хүчийг хүлээн зөвшөөрч Эдогийн сүүлийн үед байгуулсан тэгш бус гэрээнүүдээ цуцалжээ.