5. Нарагийн үе /710-794 он/
Өнөөдрийн Нара мужийн Нара хотод эзэн хааны ордон болон засгийн газар оршин байсан үеийг Нарагийн үе гэж нэрлэдэг. Нийслэл хот нь хийц загварын хувьд Хятадын Ши-ан хотыг дууриаж байгуулагдсан юм.
Ер нь Япончууд тухайн үед илүү хөгжингүй байсан Хятадаас олон талаар суралцаж эзэмших замаар өөрсдийн засаг төрийн систем, соёл урлаг, хэл бичиг зэргийг боловсронгуй болгож байсан.
Нарагийн үед тогтоосон Тайхо гэдэг хууль ч Хятадын хуулинд үндэслэн Япон орны онцлог шинжтэй нийцүүлэн боловсруулсан юм. Энэхүү хууль журмаар төрийн зохион байгуулалт, тариалангийн газар эзэмшил болон татварын систем гэх мэтийг тодорхой заасан байсан.
Хятадын соёлоос суралцахын тулд Нарагийн 200 жилийн турш нийт арван хэдэн удаа элч нарыг явуулсан. Элч нар нь зөвхөн төрийн төлөөлөгчд биш харин Хятадад очиж эрдэм ном, шашныг суралцах үүрэг бүхий шилдэг хүмүүсийн бүрэлдэхүүнтэй байв.
Хятадад очсон хүмүүс шинийг мэдье суръя гэсэн маш их эрмэлзэлтэй байсан бөгөөд зарим нь хятад хааны хайрласан үнэт бэлгүүдийг зах дээр зарчихаад бөөн бөөнөөр ном худалдан авч усан онгоцонд ачиж эх орон руу буцав гэж Хятадын түүхэн шастард тэмдэглэж байна.
Хятадаас харьж ирсэн лам нарын ач тусаар буддын шашин бас маш их дэлгэрсэн. Засгийн газрын зүгээс ч Япон Улсын энх тайвны төлөө буддын шашиныг дэмжиж урамшуулдаг байв.
Жишээлбэл эзэн хааны зарлигаар Нара хотын Тодайжи сүмд улсыг хамгаалан аливаа гай гамшигаас зайлсхийхийн тулд асар том бурханы баримлыг барьсан. Энэ үеэр дотоод гадаадын лам нар хүрэлцэн ирж номын хурал болж өргөнөөр тэмдэглэсэн.