6. Хэйангйин үе /794-1185 он/
Өнөөдрийн Киото хотод нийслэл Хэйан-кио оршин байсан үеийг Хэйангийн үе гэж нэрлэдэг. Өмнөх үед нь гадаадаас орж ирсэн зүйлийг сайтар эзэмшсэн үндсэн дээр япончилсон өвөрмөц соёл урлаг дэлгэрсэн билээ.
Жишээлбэл ноён бүсгүйчүүд үсээ шаланд хүртэл урт ургуулж хувцасаа хэд хэдээр нь давхарлаж өмсөх заншилтай байв.
Хэйангийн эхний үед эзэн хаан шууд төр барьж байсан. Ноёд түшмэд бол аль болох эзэн хаантай нягт холбоотой болохыг хичээж охидуудаа дараалан эзэн хаан болон түүний удмын эхнэр болгодог байв. Ингээд эрх мэдлээ хамгийн их нэмэгдүүлсэн Фүживара овогтон сүүлдээ жинхэнэ ёсоор засаг төрийг эзэмшдэг болов.
Хааны ордонд үй олон эхнэр болон эмэгтэй зарц нар нь суудаг байсан. Тэд боловсрол сайтай мөртлөө бараг хийх ажилгүй суудаг байсан учраас зохиолоо бичин харилцан уншилцдаг байжээ. Тиймээс Хэйангийн үед утга зохиолын соёл их хөгжсөн.
Ялангуяа “Гэнжигийн тууж” гэдэг нэг царайлаг залуу маш олон хүүхнүүдтэй явалдсан тухай өгүүлсэн роман алдартай. Энэ нь дэлхийд анх бий болсон том хэмжээний зохиол болно.
Хэйангийн үед хятадын ханз үсгийг японжуулсан Хирагана үсэг голдуу эмэгтэйчүүдийн дунд өргөнөөр хэрэглэгддэг болсон ба уг “Гэнжигийн тууж” ч дан Хирагана үсгээр бичигдсэн юм.