7. Камакүрагийн үе /1185-1333 он/
Хэйангийн сүүлийн үед цэргийн түшмэд Тайра овогтон төр барьж байсан боловч түүний дарангуйллыг эсэргүүцсэн Минамото Ёритомо тэргүүтэй ноёд түшмэд бослого гаргаж улмаар 6 жил дайтав. Минамото Ёритомо өнөөдрийн Канагава мужийн Камакүра хотод захиргааны төвийг байгуулж тус дайнд ялалт байгуулсан. Иймд энэ үеийг Камакүрагийн үе гэж нэрлэдэг.
Хэдийгээр Минамото Ёритомо эзэн хаанаас доор байр суурь бүхий жанжны тушаалтай байсан боловч жинхэнэ хэрэгтээ төрийн эрх барьж байжээ. Иймэрхүү маягийн засаглалыг Бакүфү /жанжны засаг төр/ гэж нэрлэдэг.
Минамото Ёритомо нас барсны дараа түүний хадам болох Хоужо овогтон их хүчирхэгжиж засгийн эрхийг атгасан билээ. Тэр үеэр жанжины засаг төр улам хүчирхэг болж эзэн хаан ямар ч эрх мэдэлгүй байв.
Хоужоо Токимүнэгийн үед Юан Улсаас Хубилай хааны элч удаа дараагаар ирж Японыг Юан Улсын харъяат улс болохыг шаардав. Японы тал үүнийг үл тоомсорлосон тул монгол цэргүүд хоёр удаа Япон Улсад довтлон иржээ.
Харин монгол цэргүүд удахгүй буцаж явчихаад Япон Улс эзлэгдэхэд хүрээгүй байна. Энэ учир шалтгааны талаар тухайн үед далайн хар салхи үүссэн, эсвэл монголчууд зүгээр тагнахаар ирж дараа жинхэнээр довтлох санаатай байсан, мөн цэргийн багийг голдуу Юан Улсын хөлслөн авсан солонгосчууд болон хятадуудаар бүрдүүлсэн учраас тэмцэлдэх идэвхи муутай байсан гэх мэтийн янз бүрийн таамаглал байдаг.