Дээр үед эзэн хааны гэр бүлийнхэн язгууртнаас охиныг сонгож бэр оруулах ёс заншилтай байв. Харин эдүгээгийн эзэн хааны хатан Мичико бол эгэл иргэдийн гаралтай. 1934 онд Ниссин сэйфүн гэдэг томоохон гурил үйлдвэрлэгч компаний захирал Хидэзабүро Шоудагийн ууган охин болгон Мичико мэндчилэв.
Мичикогийн гэр бүл зуны амралтаар Нагано мужийн Каруизава гэдэг газраар зусланд сууж амардаг байв. Каруизава сэрүүн уур амьсгалтай тул дандаа баячууд зундаа очиж амардаг байсан юм. 1957 онд Сэйшингийн бүсгүйчүүдийн дээд сургуулиа төгссөн жилийн зун Каруйзавад теннисийн тэмцээн зохион байгуулагдаж түүнд оролцож байхад тухайн үеийн хаан хүү буюу өнөөдрийн эзэн хаантай танилцав.
Ихэнх хүмүүс хаан хүүтэй тэмцэхдээ хэрэв түүнийг ялчихвал эвгүй гээд зориудаар түүнд ялагдахыг хичээдэг байв. Харин Мичико бол төрөлхийн мөчөөгөө өгөх дургүй зантай байсан тул хамаг хүчээ шавхаж хаан хүүтэй үзэлцэж түүнийг ялчихсан. Хаан хүүгийн хувьд бусад хүмүүс шиг ай тал засах гээгүйгээр шударгаар харилцсан энэ бүсгүй маш онцгой санагдсан байлгүй.
Удалгүй тэд хоёр үерлэдэг болж эзэн хааны гэр бүлийн хурал дээр тэд хоёр гэрлэхийг зөвшөөрөв. Хэвлэл мэдээллийнхэн “өчүүхэн гурилчин айлын охин эзэн хааны гэр бүлд бэр орох боллоо” гээд яг үнсгэлжин охин мэтээр бичиж ард иргэдийн сонирхлыг ихэд татав.
1959 онд хаан хүү болон Мичико хоёрын гэрлэлтийн ёслол болж Япон Улс даяар өргөнөөр тэмдэглэв. Хурим болохоос өмнөхөн Японд телевиз дамжуулагдаж эхэлжээ. Тухайн үеийн хүмүүс тэдний хуримыг үзэхээр телевиз авч байсан. Түүнээс хойш 1964 оны Токиогийн Олимп болох хүртэл телевизтэй айлуудын тоо эрс нэмэгдсэн байв.