Шинто шашин
Шинто шашин нь япончууд дээр үеэс шүтэж ирсэн шашны нэг болох бөгөөд өнөөдөр яг өөрийгөө Шинтогийн шүтлэгтэн гээгүй ч шинэ жилийн баярын өдөр, нялх хүүхдээ төрүүлсөн тохиолдолд Шинтогийн сүмд очиж мөргөдөг хүн цөөнгүй байдаг.
Шинтогийн үзэл бодол япон нутагт балар эртний үед бий болсон байгалийн аливаа зүйл бүхэн өөрийн сахиус бурхантай гэсэн анимизмын шүтлэгтэй нягт холбоотой. Ер нь япончууд ертенцөд Найман сая бурхан оршдог гэж ярьдаг. Энэ нь маш олон тэнгэр бурхан байдаг гэсэн утгатай үг билээ.
Үүнд жишээлбэл эрт дээр үеийн тэнгэр бурхад, тус бүрийн нутгийн сахиус бурхад, эзэн хааны өвөг дээдсүүд, түүхэн баатарууд гэх зэрэг нь хамаарагдана.
Хэдийгээр Шинтод тодорхой номлол бүхий ном судар гэж байдаггүй ч эрт дээр үед эмхэтгэсэн “Эртний тэмдэглэл”, “Японы шастир” гэх мэтийн нилээд домгийн шинжтэй түүхэн тэмдэглэлийг шүтлэгийн үндэслэл болгодог.
Уг бичгүүдэд Изанаги болон Изанами гэдэг хос бурхан гарч ирдэг. Тэд Япон арлыг анх бий болгосон ба Изанаги өөрийнхөө охин Аматэрасүд тэнгэрийн ертөнцийг сахихыг захисан.
Аматэрасү бол даруй Тэнгэрийг гийгүүлэгч гэсэн нэртэй нарны бурхан юм. Нэг өдөр Аматэрасү дүүдээ гомдож хад чулууны хөндийд нуугдсан тул ертөнцөд ямар ч гэрэлгүй болсон гэсэн домог бий.
Шинтогоор Аматэрасүг Найман сая бурхан дотор тэргүүн байр суурь эзэлдэг хэмээн үзэж шүтдэг. Улмаар Аматэрасүгийн удмыг залгамжилсан Жинмү гэдэг хүн японы анхны эзэн хаан болсон бөгөөд тэрвээр өнөөдрийн японы эзэн хааны өвөг дээдэс мөн гэж үздэг билээ.