Цайны ёслол
Цайны ёслол бол япон үндэсний ёс заншлын дагуу цай чанаж зочиноо дайлдаг урлагийн нэг юм.
Түүнд зөвхөн нэг аяга цайгаар үл барам эзэн ба зочид хоорондын найрсаг уур амьсгал, цайны багаж хэрэгслийн талаар гүнзгий ойлголт, өрөөнд тавьдаг зураг болон цэцгийн өнгө үзэмжийн зохицол гэх мэтийн тал бүрийн зүйл хамаарагддаг тул япончууд цайны ёслолыг ерөнхий урлаг хэмээн үзэж ач холбогдол өгдөг билээ.
Цайны ёслол анх бий болохдоо буддын шашины зэн урсгалын үзэл бодлын нөлөө ихтэй байсан тул ваби гэдэг ойлголтыг эрхэмлэдэг болсон. Ваби гэж юу вэ гэвэл гаднаа гялалзсан биш харин даруухан, навсарсан зүйлийг илүүд үзэж түүн дотроос үзэмжийн төгөлдрийг хайж олох гэсэн ойлголт юм.
Түүнчлэн цайны ёслолыг Азүчи-Момоямагийн үед Сэн-но Рикюү гэдэг мэргэжлийн цайны ёслолын багш улам боловсронгуй болгосон. Өнөөдөр Сэн-но Рикюүгийн уламжлалыг залгамжилсан гурван гол урсгалаас гадна өөр хэд хэдэн урсгалууд байдаг.
Цайны ёслолд хэрэглэдэг цайны идээ нь нунтаг ногоон өнгөтэй япон цай болох ба түүнийг аяганд хийн дээрээс нь буцалсан ус нэмэж, зориулалтын багс хэлбэртэй зүйлээр хутган хөөсрүүлэн зочиндоо өргөн барьдаг.
Зочин нь цай сөгнөгч болон бусад зочиддоо мэхийн ёслож цайны аягаа атгана. Үнэт цайны аяганд хүндэтгэл илэрхийлэх үүднээс аягаа нар зөв эргүүлэн хээ угалзгүй талыг нааш нь харуулна. Тэгэхдээ ямар дуу чимээ гаргалгүй хөнгөхөн амсах маягаар цайг ялигүй амсаад буцаан хүндэтгэлтэйгээр гардуулна гэх мэтийн ёс байдаг.
Өнөө үед гадаад хүмүүст зориулсан цайны ёслол үйлдэгдэх нь олширсон. Мөн ёс жаяг сайн мэдэхгүй харь газрын зочиддоо зориулж хялбаршуулсан хэлбэрээр япон маягаар сөгдөж суулгах бус сандал дээр суулгах нь элбэг тул
санаа зоволтгүйгээр цайны ёслолыг таашаан соёрхох боломжтой болжээ.
Хэрэв та бүхэн цайны ёслолд сууж үзэе гэвэл бичгийн хэрэгслийн дэлгүүр олж кайши гэдэг зориулалтын цаасан алчуур олоод авч яваарай гэж зөвөлмөөр байна. Япончууд таныг япон ёс заншлыг яасан сайн мэддэг вэ гэж гайхаж магадгүй.