9. Азүчи-Момоямагийн үе /1573-1603 он/
Орон нутгийн захирагчдын нэг асан Ода Нобүнага нь бага насандаа нилээд этгээд хувцаслах дуртай байсан бөгөөд элдэв сонин үйлдлүүд ч хийдэг байж. Үүнд нь гайхсан хүмүүс түүнийг “Их тэнэг” хэмээн нэрлэж шивэр авир хийдэг байв.
Тэрээр насанд хүрэхдээ өөрт олдсон завшааныг чадамгай ашиглан, арга мэх сайтай тэмцэлцэж чадсан тул эрх мэдлээ нэмэгдүүлсэн төдийгүй түүнийг дэмжигчдийн хүрээ ч аажим аажимаар ихэсчээ. Улмаар цэргүүдээ дагуулан Киото хотод ирж жанжин Ашикага Ёшиакиг өргөмжлөн засгийн эрхийг атгаж амжив. /1573 он/
Ода Нобүнага тухайн үед Японд дөнгөж нэвтэрч эхэлж байсан бууг чадварлаг ашиглан дайтаж зэргэлдээ орших бүс нутгуудыг дараалан эзэмшилдээ оруулжээ. Тэрээр уламжлалт ёс заншил, үзэл бодолд үл баригдан шинэ зүйлийг санаж сэдэхдээ авъяаслаг нэгэн байсан билээ.
Ода Нобүнага нь өөрийн туслахуудын хуйвалдааны улмаас нас баржээ. /1582 он/ Тэр даруй түүний өөр нэг шадар туслах нь болох Тоётоми Хидэёши Киотод буцаж ирэн хуйвалдагсадыг алж засгийн эрхийг авчээ.
Улмаар Тоётоми Хидэёши хэд хэдэн дайнд ялалт байгуулсны дүнд эзэн хааны шадар сайдаар томилогдон бүх Японыг нэгтгэж улс төрийн байдлыг тогтворжуулж, түүхэн гавъяа байгуулав.
Ода Нобүнагагийн ордонг Азүчи цайз, Тоётоми Хидэёшигийн өргөөг Момояма цайз гэдэг учраас энэ үеийг Азүчи-Момоямагийн үе гэж нэрлэдэг.
Азүчи-Момоямагийн үед европын наймаачид их ирдэг болж барууны орнуудын эд бараанаас гадна христосын шашин ч орж ирсэн юм.