Шикки
Шикки бол нямба мод [Lat.Toxicodendron vernicifluum]-ын давирхайн лакаар өнгөлсөн модон эдлэл бөгөөд японы уламжлалт урлалын нэг болно.
Англи хэлээр шаазан эдлэлийг chinaware /хятад эдлэл/ гэдэг бол шиккийг japanware /япон эдлэл/ гэдэг. Барууныхан шиккийг японыг төлөөлдөг үндэсний бүтээгдхүүн хэмээн үзэж ач холбогдол өгдөг бололтой.
Шикки бүтээгч гар урчууд нь дээр үеэс уламжлан ирсэн мастер багшид шавь орж олон жилийн турш суралцаж мэргэшсэн хүмүүс юм.
Ер нь гар урчууд ажилдаа сэтгэлээсээ ханддаг хүмүүс байдаг. Ашиг орлого, нэр алдарын төлөө зүтгэх бус, зөвхөн чин үнэнээсээ чанар сайтай эд хийхийг эрмэлздэг бөгөөд жинхэнэ гар урчийг хамгийн хүн чанартайд тооцдог билээ.
Япончууд гар урчуудад ихээхэн хүндэтгэл үзүүлдэг ба тэд нар өөрсдөө ч ажил мэргэжлээрээ бахархаж явдаг. Зарим гар урчийг японы соёлын өвийг хамгаалах хуулиар “Төрийн амьд эрдэнэ” буюу биет бус соёлын өв болгон бүртгэсэн байна. Шиккигийн салбарт бас Төрийн амьд эрдэнэ болсон хорь орчим хүн байдаг.
Шиккигийн өнгөлгөө хийхэд хар эсвэл улаан өнгөтэй лаакыг хэд хэдэн удаа давхарлаж буддаг. Түүн дээр алт мөнгө, дунгаар хээ угалз чимэглэх нь ч бий.
Өнөөдөр ч япончууд үндсэн идээний нэг болох мисосирү гэдэг шөл уухдаа хар улаан өнгөтэй аягаар уух дуртай. Харин харамсалтай нь айлд хэрэглэдгийн ихэнх нь жинхэнэ шикки биш, орчин үеийн үйлдвэрлэлийн аргаар боловсруулсан химийн хольцтой лаакан будаг бүхий хуванцар эд байдаг.