4. Асүкагийн үе /VI зууны сүүлч-710 он/
Өнөөдрийн Нара муж дахь Асүка гэдэг газарт эзэн хааны ордон оршин байсан үеийг Асүкагийн үе гэж нэрлэдэг. Энэ үед гадаад орноос буддын шашин албан ёсоор орж ирээд нэвтэрч Япон Улсын бүтээн байгуулалтад ихээхэн нөлөө үзүүлэв.
Анх буддын шашин орж ирэхэд түүнийг дэмждэг овогтон болон эсэргүүцдэг овогтон гэж язгууртнууд хоёр хуваагдан тэмцэл үүссэн. Дэмжигч талынхан Шотокү Тайши нарын туслалцаатайгаар ялалт байгуулав.
Тухайн үеийн эзэн хаан нас барсны дараа эзэн хааны ширээнд эмэгтэй хүн суусан тул түүний туслахаар Шотокү Тайши төрийн их сайдаар томилогдов.
Шотокү Тайшигийн хүчин чармайлтаар төрийн удирдлага, зохион байгуулалтын нэгдсэн систем бий болох үндэс суурь тавигдсан. Жишээлбэл ноёд түшмэдийг зиндаагаар нь 12-оор ангилж тэд нарт тус тус 12 өөр төрлийн өнгөтэй титэм өмсгөв.
Асүкагийн үед элч нарыг усан онгоцонд суулгаж Хятад руу явуулдаг байв. Тэр үед Хятадын хаан ойр хавийн бүх орнуудыг өөрийнхөө харъяат орон хэмээн үздэг байсан.
Нэг удаа Шотокү Тайши Япон бол Хятадтай эрх тэгш гэдгийг харуулахын тулд “Нар мандах орны хаан нь нар шингэх орны хаанд мэндчилж байна” гэж бичсэн захидлаа явуулж Хятадын хааныг хилэгнүүлэхэд хүргэсэн билээ.